Հինգ հետաքրքրական փաստ՝ Գանատական Գոհաբանութեան օրուան մասին

Գանատայի տարածքին, ամենէն ժողովրդական տօներէն մէկն է Գոհաբանութեան օրը: Տօնը իր մէջ կը խտացնէ մարդկայնական ազնիւ գաղափարներ եւ բարոյական բարձր արժէքներ, ինչպէս՝ երախտագիտութիւն, երախտապարտութիւն, շնորհակալական զգացում, այլասիրութիւն, հիւրասիրութիւն եւ իրարօգնութիւն:

Ստորեւ կը ներկայացնենք հինգ հետաքրքրական փաստ Գանատական Գոհաբանութեան օրուան մասին:

1. Գանատայի մէջ, Գոհաբանութեան օրը կը զուգադիպի ամէն Հոկտեմբերի երկրորդ երկուշաբթի օրուան:

2. Գոհաբանութեան օրը Գանատայի մէջ պաշտօնապէս սկսած են տօնելու 6 Նոյեմբեր 1879-ին:

Գոհաբանութեան օրուան արարողութիւն՝ Ֆրանսայի Տենենի եկեղեցիի շրջափակին մէջ, ի յիշատակ եւ ի պատիւ Գանատական զօրքերուն, Հոկտեմբեր 1918: (լուսանկարը տրամադրած է Dept. of National Defence/Library and Archives Canada, PA-40239 and PA-40240)

3. Միացեալ Նահանգներուն մէջ Գոհաբանութեան օրը կը նշեն Նոյեմբերի չորրորդ հինգշաբթի օրը: Որովհետեւ Գանատայի մէջ օդը աւելի շուտ կը ցրտէ, մեր բերքահաւաքը աւելի կանուխ կը կատարուի: Այս է պատճառը, որ Հոկտեմբերին (եւ ո՛չ թէ Նոյեմբերին) կը տօնենք Գոհաբանութեան օրը:

Միացեալ Նահանգներու եւ Գանատայի դրօշակները՝ կողք-կողքի (լուսանկար՝ Loozrboy-ի/Flickr)

4. Բացի Ատլանտեան նահանգներու Փրինս Էդուարդ այլնտէն, Նուֆընտլենտ եւ Լապրատորէն, Նու պրանսուիքէն եւ Նովա սքոշայէն, Գանատայի մէջ Գոհաբանութեան օրը օրէնսդրական տօն (statutory holiday) է:

(լուսանկար՝ Leo Reynolds-ի/Flickr)

5. 2020 թուականին Գոհաբանութեան օրուան նախօրեակին, Գանատայի ժողովուրդը 2,5 միլիոն ամբողջական հնդկահաւ գնած է (այսինքն՝ տարուան ընթացքին վաճառուած հնդկահաւերու երեսունվեց տոկոսը):

Գոհաբանութեան օրուան աւանդական ճաշատեսակը՝ հնդկահաւը (լուսանկար՝ Nicholas Grande-ի)

«Թորոնթոհայ»-ը սրտանց կը շնորհաւորէ ձեր բոլորին Գոհաբանութեան օրը: