Ղարաբաղը կը կանչէ
լուսանկարը՝ Սարին Աւետիսեանի
Զարթիր, լա՛օ, Ղարաբաղը կը կանչէ
Հայոց ազգին որդիները օգնութեան,
Միանալու իր էութեան, իր Մեծ Տան՝
Հզօր կամքով մշտակենդան:
Արցախը ազատ ապրած է դարեր,
Պատմութիւն կերտած հայու արիւնով,
Պիտբ դառնայ ազատ կրկին պայքարով,
Պապենական սուրբ հաւատքով:
Ղարաբաղը շղթայուած է, ո՜վ հայեր,
Բռնապետի նենգութեամբը ոճրածին,
Կը տառապի կարօտովը դառնագին՝
Ազատութեան լուսաբացին:
Արցախեան ձայնը՝ անթեղուած կրակ,
Բոցավառած է սիրտը հայութեան,
Վերածուած է ոգին Արամեան՝
Գանձասարէն մեր սրբազան:
Իմ Արցախ սիրասուն,
Դո՛ւն սիրտն ես հայութեան,
Դո՛ւն երազ անթառամ,
Յաւերժական իմ Հայաստան:
25 օգոստոս 1989
Թորոնթոհայ բանաստեղծ Գրիգոր Հոթոյեանի «Ղարաբաղը կը կանչէ» (1989) վերահրատարակուած է վերջերս լոյս տեսած «Սրտաբուխ բանաստեղծութիւններ» հատորին մէջ:
Այսօր 2020-ի արցախեան 44-օրեայ պատերազմի հինգերորդ տարելիցն է: 27 սեպտեմբեր 2020-ին Ազրպէյճանը՝ Թուրքիոյ աջակցութեամբ լայնածաւալ ռազմական յարձակում սկսաւ Արցախի շփման գիծի գրեթէ բոլոր ուղղութիւններով՝ կիրառելով օդուժ, հրետանի եւ անօդաչու թռչող սարքեր, հրթիռակոծելով նաեւ խաղաղ բնակավայրերը։
