Սիրելի Ռոպէր Հատտէճեանին

Սրտի խոր կսկիծով իմացանք, որ հայ մամուլի մեծ գործիչ, Պոլսոյ «Մարմարա» թերթի երակարամեայ խմբագիր Ռոպէր Հատտէճեան կնքած է իր մահկանացուն։

«Թորոնթոհայ»-ի խմբագրական կազմը իր խորազգաց ցաւակցութիւնները կը յայտնէ Հատտէճեան ընտանիքին, «Մարմարա» թերթի խմբագրութեան եւ անձնակազմին եւ հայ մամուլի մեծ ընտանիքին:

Յիշատակն արդարոց օրհնութեամբ եղիցի։

լուսանկար՝ Պերճ Արապեանի

Այս տխուր առիթով կը վերահրատարակենք թորոնթոհայ գրող, բանաստեղծ Գրիգոր Հոթոյեանի «Սիրելի Ռոպէր Հատտէճեանին» բանաստեղծութիւնը:

---

Սիրելի Ռոպէր Հատտէճեանին

Գրիգոր Հոթոյեան

Մեսրոպ Մաշտոցի աւիշով սնուած՝

Դուն հանճարածին ժառանգ մեսրոպեան,

Սուրոէն փոխանցուած օրհնութեամբ զինուած՝

Ողջո՜յն արեւիդ, Ռոպէր Հատտէճեան:'

Հայոց մեծասքանչ լեզուին ծառայող՝

Անխոնջ ուսուցիչ Սահակ-մեսրոպեան,

Անխախտ հաւատքով, գրչով առինքնող՝

Հայ լեզուի պահակ, Ռոպէր Հատտէճեան:

Ի վերուստ օժտուած խելքով իմաստուն՝

Հայ ժողովուրդի զաւակ խոհական,

Հպարտ ենք քեզմով, մեսրոպահնչիւն

Կեանքովդ վսեմ, Ռոպէր Հատտէճեան:

Հայ թերթի, գիրքի, գրականութեան

Անձնուէր մշակ, աղբիւր անխափան,

Հայակերտումի շունչով նայիրեան

Կը քալես ընդմիշտ, Ռոպէր Հատտէճեան:

Մեր քաղցր լեզուով, «Մարմարա» թերթով,

Յուշատետրերուդ շարքով պատմական,

Ազգային ոգին աննկուն կամքով

Արթուն կը պահես, Ռոպէր Հատտէճեան:

Աստուածապարգեւ տաղանդով ծնած

Մանուկ հասակէն՝ հայոց դպրութեան,

Թարգմանչաց ուխտով ոգեղինացած՝

Մշտավառ կանթեղ, Ռոպէր Հատտէճեան:

Իմ տկար գրչով, խօսքով սրտագին

Կը գովերգեմ քեզ ու կը հիանամ

Վաստակին բուրեան՝ չքնաղ ու անգին,

Հայ գիրի վարպետ, Ռոպէր Հատտէճեան:

Այժմ կ’աղօթենք, որ կեանքդ ըլլայ

Առողջ ու երկար, բոյրով դիւթական,

Ազգաշէն միտքդ միշտ պայծառ մնայ,

Պանծալի գրող, Ռոպէր Հատտէճեան:

25 ապրիլ 2012